تیمێکی توێژەران شێوازێکی نوێیان بۆ باشترکردنی کارایی و تەمەنی پاتری بەکارهێنراو لە ئامێر و ئۆتۆمبێلە ئەلیکترۆنییە جیاوازەکاندا داڕشتووە. زیادکردنی چڕی وزە و تەمەنی خانەی پاتریەکان، بەتایبەتی ئەوانەی کە کاتۆدی دەوڵەمەند بە نیکلیان هەیە، تەحەدایەکی گەورەیە بۆ کۆمپانیاکانی پاتری سازی. تەکنیکە نوێیەکەی توێژەران کە بریتییە لە شۆردن و داپۆشینی کاتۆدەکانی پاتری بە گیراوەیەکی تایبەت. کە بە چارەسەرێکی گونجاو بۆ ئەو کێشانە دادەنرێت.
بەپێی بابەتێک کە لە ڕۆژنامەی Nature بڵاوکراوەتەوە، تیمێکی توێژەرانی زانکۆی هانیانگی کۆریای باشوور چارەسەرێکی سادە و لە هەمان کاتدا کاریگەریان بۆ مانەوەی خانەکانی پاتری داڕشتووە. ئەوان کاتۆدی پاترییەکانیان بە ئاوێک شۆرد کە ئایۆنی کۆبالت (Co)ی تێدایە. ئەم پرۆسەیە لیتیۆمی زیادە لە ڕووی کاتۆدەکە لادەبات و چینێکی تەنک و یەکسان و دەوڵەمەند بە کۆبالت دروست دەکات کە وەک قەڵغانێکی پارێزەر کاردەکات. ئەم چینە ڕێگری دەکات لە بەرکەوتنی ڕاستەوخۆی کاتۆد لەگەڵ ئەلکترۆلایتەکە. بەم شێوەیە ئەگەری لەناوچوونی زیاتر کەمدەکاتەوە.
زیادکردنی چڕی و تەمەنی پاتریەکان:
پاتری پێویستە بۆ بەهێزکردنی زۆرێک لە ئامێرەکان، لە مۆبایلە زیرەکەکان و لاپتۆپەکانەوە تا ئۆتۆمبێلی کارەبایی. بەڵام یەکێک لە کێشە سەرەکییەکانی بەردەم گەشەپێدەرانی پاتری بریتییە لە چۆنیەتی زیادکردنی چڕی وزە و مانەوەی خانەکانی پاتری. بەتایبەتی ئەوانەی کە ماددە چینە دەوڵەمەندەکان بە نیکل (Ni) وەک کاتۆد بەکاردەهێنن.
کاتۆدەکانی دەوڵەمەند بە نیکل چەندین سوودیان هەیە وەک توانای بەرز و تێچووی کەم. بەڵام یەک کەموکوڕی گەورەیان هەیە، ئەویش بەهۆی کارلێکی زۆر لەگەڵ ژینگەی دەوروبەریان، مەیلیان هەیە بە خێرایی تێکبچن. ئەمەش دەبێتە هۆی دروستبوونی پێکهاتەی لیتیۆمی نەخوازراو لەسەر ڕووی کاتۆدەکە و کارلێکی زیانبەخش لەگەڵ ئەلکترۆلایتەکە.
بۆ تێپەڕاندنی ئەم کێشەیە، توێژەران کاتۆدەکانیان بە گیراوەی ئایۆنەکانی کۆبالت شۆردەوە. هەروەها ڕوپۆشێکی فلۆرینیان لەسەر کاتۆدی شۆردراو زیاد کردووە، ئەمەش سەقامگیری و سەلامەتی خانەی پاترییەکەی زیاد کردووە. پۆشینی فلۆرین ڕێگری دەکات لە شیبوونەوەی خوێی ئەلکترۆلایت و دروستبوونی بڵقی گازی؛ ئەم بڵقانە دەبنە هۆی ئاوسانی پاتری و تەقینەوە.
توێژەران تەکنیکی شۆردن و ڕوپۆشکردنیان لەسەر چەند کاتۆدێکی دەوڵەمەند بە نیکل تاقیکردەوە، ئەمەش کارایی و تەمەنیان بە شێوەیەکی بەرچاو باشتر کرد. کاتۆدە شۆردراوەکان زیاتر لە 90%ی توانای سەرەتایی خۆیان پاراستووە دوای 500 خولی بارگاویکردنەوە. هەروەها ئەم پاتریانە چڕی وزەی بەرزتر و بەرهەمهێنانی گازی کەمتریان نیشان دا لە چاو کاتۆدی ئاسایی.
