سەرۆکی ئەمریکا پەردەی لەسەر یەکەمین فەرمانی جێبەجێکردن لە بواری زیرەکی دەستکرد لادا
جۆ بایدن سەرۆکی ئەمریکا بۆ یەکەمجار پەردەی لەسەر فەرمانی جێبەجێکردن لە بواری زیرەکی دەستکرد لادا. ئەمە یەکەم کردەوەی حکومەتی ویلایەتە یەکگرتووەکانی ئەمریکایە لە جۆری خۆیدا، کە لە ٨ بەشدا باس لە فەرمانی جێبەجێکردن دەکات. کە پرسگەلێک هەڵدەسەنگێنێت لەوانە پرسی ئەمنی، پرسی مافە مەدەنییەکان، و لێکۆڵینەوە لەسەر کاریگەریی زیرەکی دەستکرد لەسەر بازاڕی کار.
بڕگەکانی پەیوەست بەم فەرمانە جێبەجێکردنە پێشتر بۆ کۆمپانیا پێشەنگەکانی بواری زیرەکی دەستکرد دیاریکرابوون. بەڵام ئەمە یەکەم کردەوەی پابەندکەری حکومەتە سەبارەت بەم تەکنەلۆژیایە.
![جۆ بایدن](https://chawga.com/wp-content/uploads/2023/11/BIDEN1.jpg.webp)
یەکەمین فەرمانی جێبەجێکردن لە بواری زیرەکی دەستکرد لەلایەن جۆ بایدن
لە کاتێکدا دەزگاکانی جێبەجێکردنی یاسا هۆشداریان داوە کە ئامادەن یاساکانی ئێستا سەبارەت بە خراپ بەکارهێنانی AI جێبەجێ بکەن و کۆنگرێس خەباتی کردووە بۆ ئەوەی زیاتر دەربارەی یاسا نوێیەکان بزانێت. بەڵام فەرمانی جێبەجێکردن دەتوانێت کاریگەرییەکی دەستبەجێتری هەبێت. کۆشکی سپی ئەم فەرمانەی بەسەر هەشت بەشدا دابەشکردووە:
- دروستکردنی ستانداردی نوێی سەلامەتی و ئاسایش بۆ AI: داواکردنی هەندێک لە کۆمپانیاکانی AI بۆ هاوبەشکردنی ئەنجامی تاقیکردنەوەی سەلامەتی لەگەڵ حکومەتی فیدراڵی و یارمەتیدانی وەزارەتی بازرگانی بۆ پەرەپێدانی ڕێنماییەکان لەسەر AI. و پەرەپێدانی پلانی ئاسایشی ئەلیکترۆنی بۆ دەستنیشانکردنی کەموکوڕییەکانی ئەم تەکنەلۆژیایە.
- پاراستنی نهێنی بەکارهێنەر: ڕوونکردنەوەی ڕێنماییەکان کە دەزگاکان دەتوانن بەکاریان بهێنن بۆ هەڵسەنگاندنی تەکنیکەکانی پاراستنی نهێنی کە لە زیرەکی دەستکرددا بەکاردەهێنرێن.
- پاراستنی دادپەروەری و مافە مەدەنییەکان: ڕێگریکردن لە جیاکاری AI بە ڕێنمایی گونجاو لە ڕێگەی بەڵێندەرانی فیدراڵی. هەروەها دروستکردنی باشترین پراکتیزە لە بەکارهێنانی دروستی زیرەکی دەستکرد لە سیستەمی دادوەریدا، لەوانە بەکارهێنانی بۆ دەرکردنی سزا، هەڵسەنگاندنی کەیسە مەترسیدارەکان و پێشبینیکردنی تاوان.
- پاراستنی بەکاربەر: دروستکردنی بەرنامەیەک بۆ هەڵسەنگاندنی ڕێوشوێنە تەندروستییەکانی پەیوەست بە زیرەکی دەستکرد بە گشتی و لەگەڵ ستراتیژی وەزارەتی تەندروستی. هەروەها ڕوونکردنەوەی پلانێک بۆ بەکارهێنانی بەرپرسیارانەی ئامرازەکانی AI لەم بوارەدا.
- پشتگیریکردنی کرێکاران: ئامادەکردنی ڕاپۆرتێک لەسەر دەرئەنجامەکانی AI لەسەر بازاڕی کار و لێکۆڵینەوە لەو ڕێگایانەی کە حکومەتی فیدراڵی دەتوانێت پشتگیری لەو کرێکارانە بکات کە بەهۆی AI کارەکانیان لەدەست دەدەن.
- پێشخستنی داهێنان و کێبڕکێ: زیادکردنی بودجە بۆ توێژینەوەی AI لە بوارەکانی وەک گۆڕانی کەشوهەوا. هەروەها لە بوارەکانی ڕاکێشانی کەسانی لێهاتوو بۆ نیشتەجێبوون لە ئەمریکا لەم بوارەدا.
- هاوکاری لەگەڵ کۆمپانیا نێودەوڵەتییەکان: بە ئامانجی جێبەجێکردنی ستانداردەکانی زیرەکی دەستکرد لە سەرانسەری جیهاندا.
- پەرەپێدانی ستراتیژییەکان بۆ بەکارهێنانی گونجاوی زیرەکی دەستکرد لەلایەن حکومەتی فیدراڵیەوە: ڕوونکردنەوەی ڕێنماییەکان بۆ بەکارهێنانی گونجاوی زیرەکی دەستکرد لەلایەن دامەزراوە فیدراڵیەکانەوە. و خێراکردنی دامەزراندنی کرێکاری لێهاتوو لەم بوارەدا لەلایەن حکومەتەوە.
بروس ڕید، جێگری سەرۆکی ئەرکانی کۆشکی سپی لە بەیاننامەیەکدا ڕایگەیاند: ئەم فەرمانە جێبەجێکردنە بەهێزترین کۆمەڵە ڕێوشوێنە کە تا ئێستا هەر حکومەتێک لە جیهاندا لە بواری متمانەی AI گرتبێتەبەر.