توێژەران توانیان ڕێگەیەک بدۆزنەوە بۆ یەکخستنی هەردوو بواری بایۆلۆجی و ئەلیکترۆنیک. ئەنجامی ئەم توێژینەوەیە کۆمپیوتەرێکی بایۆلۆجی تێکەڵە کە شانەکانی مێشکی مرۆڤ لە تاقیگەدا لەگەڵ بازنەی ئەلیکترۆنی و زیرەکی دەستکرد تێکەڵ دەکات. ئەم سیستەمە کە بە (Brainoware) ناودەبرێت، لە تاقیکردنەوەی توێژەران بە وردی لە %78 دەنگەکان دەناسێتەوە. ئەم دەستکەوتە دەتوانێت ڕۆژێک ببێتە هۆی دروستکردنی مایکرۆچیپی سیلیکۆن کە توانای تێکەڵبوونیان لەگەڵ دەمارەکاندا هەبێت.
بەپێی توێژینەوەیەک کە لە ڕۆژنامەی Nature بڵاوکراوەتەوە، سیستەمی مێشکی Brainware پۆلەکانی ئۆرگانیۆیدی مێشک لەگەڵ سووڕەکانی ئەلیکترۆنی ئاسایی تێکەڵ دەکات. پۆلە ئۆرگانیۆیدیەکانی مێشک لە ڕاستیدا لە خانە بنەڕەتییەکانی مرۆڤەوە وەرگیراون و وەک مێشکێکی بچووک وان کە پڕن لە دەمارەکان. بۆ دروستکردنی ئەم کەرەستەی مێشک، توێژەران یەک ئۆرگانیۆیدیان لەسەر پلێتێک دانا کە هەزاران ئەلکترۆدی تێدابوو بۆ بەستنەوەی مێشک بە بازنەی کارەباییەوە. ئەم بازنانە پەیوەندی لەگەڵ ئۆرگانیۆیدی مێشکدا دەکەن و زانیارییە هاتووەکان دەگۆڕن بۆ نەخشێکی پەستانی کارەبایی.
تێکەڵەیەک لە ئۆرگانیۆیدەکانی مێشک و ئەلیکترۆنیات
مێشکی مرۆڤ سەرسوڕهێنەرە. بە تێکڕا ٨٦ ملیار دەمار و تا یەک کوادریلیۆن سیناپس لە مێشکدا هەیە. هەر دەمارێک بەستراوەتەوە بە 100 هەزار دەمارەی ترەوە و بەردەوام پەیوەندی لەگەڵ یەکتردا هەیە. لە ساڵی ٢٠١٣ کۆمپیوتەری K Riken کە ئەوکات یەکێک بوو لە بەهێزترین سوپەرکۆمپیوتەرەکانی جیهان، هەوڵیدا تەقلیدی کارکردنی مێشک بکات؛ بە ٨٢ هەزار و ٩٤٤ پرۆسێسەر و یەک پێتابایت بیرگە، ٤٠ خولەکی خایاند بۆ ھاوشێوەکردنی یەک چرکە لە چالاکییەکان لە تەنھا یەک بۆ دوو لەسەدی مێشکی مرۆڤەوە.
لەم ساڵانەی دواییدا زانا و ئەندازیاران هەوڵیان داوە تواناکانی مێشک بەدەست بهێنن بە دیزاینکردنی ڕەقەکاڵا و ئەلگۆریتمەکان کە تەقلیدی پێکهاتە و کارکردنی مێشک دەکەن. ئەم حیساباتانە بە حیساباتی نۆرۆمۆرفیک ناسراون و سەرەڕای پێشکەوتنەکانی ئەم دواییە، ڕاهێنانی تۆڕە دەمارییە دەستکردەکان زۆر کات دەبات.
لەم لێکۆڵینەوەیەدا، توێژەران ئۆرگانیۆیدەکانی مێشکی Brainoware بەستەوە بە ڕیزبەندییەکی چڕیی بەرزی مایکرۆئێلکترۆدەکانەوە بە بەکارهێنانی جۆرێک لە تۆڕی دەماری دەستکرد کە پێی دەوترێت کۆمپیوتەری کۆگا. هاندانی کارەبایی زانیاری دەگوازێتەوە بۆ ئۆرگانیۆید.
چینەکانی پرۆسێسەری هاتنە ژوورەوە و دەرچوون ڕەقەکاڵای باوی کۆمپیوتەر بەکاردەهێنن. ئەم چینانە دەبوو ڕابهێنرێن بۆ ئەوەی کارلێک لەگەڵ ئۆرگانیۆیدەکەدا بکەن؛ چینە دەرچوونەکە داتا دەمارییەکان دەخوێنێتەوە و زانیارییەکان پۆلێن دەکات یان پێشبینی دەکات بە پشتبەستن بە هاتنەژوورەوە.
بۆ تاقیکردنەوەی سیستەمەکە، توێژەران 240 کلیپی دەنگی هەشت کەسیان بە Brainoware داوە و داوایان لێکردووە دەنگی کەسێکی دیاریکراو دەستنیشان بکات. دوای دوو ڕۆژ ڕاهێنان، Brainoware توانی دەنگی کەسەکە بناسێتەوە بە وردی %78.
هێشتا سنووردارکردنی بەرچاو لە دەوری ئەم تەکنەلۆژیایە هەیە، وەک پرسی زیندوو ڕاگرتنی ئۆرگانیۆیدەکان و بەکارهێنانی هێزی ئامێرە لاوەکییەکان. بەڵام بە ڕەچاوکردنی بنەما ئەخلاقیەکان، Brainoware جگە لە کۆمپیوتەر، بۆ تێگەیشتن لە نهێنییەکانی مێشکی مرۆڤیش بەسوودە.
