ناساندنی زنجیرەی ئایفۆن 17 | پێداچوونەوە بە تایبەتمەندی و مۆدێل و نرخی ئەم زنجیرەیە
ئەپڵ لە سێپتەمبەری ٢٠٢٥دا زنجیرەی “ئایفۆن 17″ی نمایشکرد. زنجیرەیەک کە بە وتەی زۆرێک لە شارەزایان لەم ساڵانەی دواییدا گەورەترین گۆڕانکاری لە دیزاینی ئایفۆندا هێناوەتە ئاراوە. نەهێشتنی مۆدێلی پڵەس و ناساندنی ئایفۆن ئەیر وەک تەنکترین ئایفۆن تا ئێستا و نوێکردنەوەی بەرچاو لە کامێرا و پرۆسێسەر و شاشەکەی وایکردووە ئەم نەوەیە لە جاران زیاتر سەرنجڕاکێش بێت بۆ بەکارهێنەران و ئارەزومەندانی تەکنەلۆژیا.
تایپەتمەندییەکانی زنجیرەی ئایفۆن 17
زنجیرەی ئایفۆن ١٧ چوار مۆدێل لەخۆدەگرێت کە بریتین لە ئایفۆن 17، ئایفۆن ئەیر، ئایفۆن 17 پرۆ، ئایفۆن 17 پرۆ ماکس. هەموو مۆدێلەکان ڕوونمایەکی Super Retina XDR یان هەیە بە ڕێژەی نوێبوونەوەی 120Hz و ڕووناکییەکی زۆر بەرز، ئەزموونێکی نەرم و ڕوونی بەکارهێنەر دابین دەکات. لەم نەوەیەدا ئەپڵ زیاتر لە جاران چیپی بەهێزی A19 و وەشانی پێشکەوتووترەکەی کە A19 Pro ی بەکارهێناوە بۆ باشترکردنی خێرایی و کارایی و بەکارهێنانی وزە.
لەڕووی کامێراوە ئایفۆن ١٧ سیستەمێکی دووانەی ٤٨ مێگاپێکسڵ بەکاردەهێنێت، لەکاتێکدا مۆدێلەکانی پڕۆ کامێرایەکی سێ قاتی پرۆفیشناڵیان تێدایە کە زوومێکی باش و توانای تۆمارکردنی ڤیدیۆی سینەمایییان هەیە. جگە لەوەش کۆمپانیای ئەپڵ چیپێکی تایبەتی تۆڕی N1ی ناساندووە، کە پشتگیری لە وای فای ٧ و بلوتوزی ٦ دەکات.
| ئایفۆن ١٧ | ئایفۆن ١٧ پڕۆ | ئایفۆن ١٧ پڕۆ ماکس | ئایفۆن ئەیر | |
| ڕوونما | 6.3 ئینج | 6.3 ئینج | 6.9 ئینج | 6.5 ئینج |
| چارەسەرکەر | A19 | A19 Pro | A19 Pro | A19 Pro |
| بیرگە | 256 و 512 گێگابایت | 256 و 512 و 1012 گێگابایت | 256 و 512 و 1012 و 2024 گێگابایت | 256 و 512 و 1012 گێگابایت |
| بیرگەی کاتی | 8 گێگابایت | 12 گێگابایت | 12 گێگابایت | 8 گێگابایت |
| کامێرای سەرەکی | 48 مێگاپێکسڵ سەرەکی، 12 مێگاپێکسڵ تەلەفۆتۆ | سێ کامێرای 48 مێگاپێکسڵ | سێ کامێرای 48 مێگاپێکسڵ | کامێرایەکی 48 مێگاپێکسڵ |
| کامێرای سێڵفی | 12 مێگاپێکسڵ | 18 مێگاپێکسڵ | 18 مێگاپێکسڵ | 18 مێگاپێکسڵ |
| ڕووکار | iOS 26 | iOS 26 | iOS 26 | iOS 26 |
| قەبارەی پاتری | 3692 mAh | 3988 mAh (جۆری سیمکارتی) | 4832 mAh (جۆری سیمکارتی) | 3149 mAh |
| نرخ (وەشانی بنەڕەتی) | 799 دۆلار | 1099 دۆلار | 1199 دۆلار | 999 دۆلار |
پاتری باش بە توانای بارگاویکردنەوەی خێرا، جەستەیەکی بەهێز بە پۆششی سیرامیک شیڵد ٢، نەهێشتنی مۆدێلی پڵەس، و زیادکردنی ئایفۆن ئەیر وەک تەنکترین ئایفۆن لە مێژوودا، تایبەتمەندییە دیارەکانی دیکەی ئەم زنجیرەیەن. بە گشتی زنجیرەی ئایفۆن 17 تێکەڵەیەک لە دیزاینی مۆدێرن و ڕەقەکاڵا بەهێزەکان و تەکنەلۆژیای پێشکەوتووی پەیوەندیکردن پێشکەش دەکات.
تایبەتمەندیەکانی ئایفۆن 17 پرۆ ماکس
مۆبایلە ئاست بەرزە نوێکەی ئەپڵ بڕیارە ئەزموونێکی جیاواز پێشکەش بە بەکارهێنەرانی ئایفۆن بکات بە دیزاینی باشتر و چیپی خێراتر و کامێرای نوێ و تایبەتمەندی نوێی نەرمەکاڵا. کۆمپانیای ئەپڵ لە دیزاینی ئایفۆن ١٧ پرۆ ماکسدا کەرەستەی نوێ و وردەکاری وردتری بەکارهێناوە، ئەمەش دیمەنێکی مۆدێرنتر و سووکتری بە ئامێرەکە بەخشیوە.
بەشی پشتەوەی مۆبایلەکە لەجیاتی تیتانیۆم لە ئەلەمنیۆم دروستکراوە، بڕیارێک کە یارمەتیدەر دەبێت بۆ باشتر بەڕێوەبردنی ئەو گەرمیەی کە بەهۆی ڕەقەکاڵای ناوەوەی مۆبایلەکەوە دروست دەبێت.
جیاوازییەکی بەرچاوی بینراوی ئەمساڵ مۆدیۆلی نوێی کامێرایە کە ئەپڵ ناوی لێناوە “پلاتۆ”. ئەم مۆدیولە ئێستا تەواوی درێژی پشتی ئامێرەکە کاردەکات، لە شریتی کامێرای مۆبایلەکانی پیکسڵی گووگڵ دەچێت.
هەروەها بژاردەی ڕەنگی نوێ بۆ مۆبایلەکە هەیە کە بریتین لە خۆڵەمێشی و پرتەقاڵی و شین. جگە لەوەش بۆ یەکەمجار لە هەردوو بەشی پێشەوە و دواوەی ئامێرەکەدا سیرامیک شیڵد ٢ بەکاردەهێنێت.
ڕوونما و کامێرای ئایفۆن 17 پرۆ ماکس
ڕوونمای ئامێرەکە بریتییە لە پانێڵێکی Super Retina XDR بە قەبارەی ٦.٩ ئینج. ئەپڵ لە چالاکییەکەیدا ئیدیعای کرد کە شاشەکە بە ڕێژەی نوێبوونەوەی 120Hz ProMotion و لوتکەی ڕووناکی 3000 نیت، بەردەوامە لە پێشکەشکردنی کوالیتی وێنەی ناوازە و ڕووناکییەکی بەرز و ئەزموونێکی نەرم.
سیستەمی کامێرای ئایفۆن ١٧ پرۆ ماکس نوێکرایەوە، بە عەدەسەی نوێ و پرۆسێسی زیرەکی وێنە بۆ باشترکردنی کوالێتی وێنە و ڤیدیۆ. بۆ یەکەمجار ئەم مۆدێلە سێ هەستەوەری ٤٨ مێگاپێکسڵ بۆ دانراوە، ئەمەش کوالێتی زووم و وێنەگرتنی لە ڕووناکی کەم باشتر دەکات. ئێستا کامێرای تەلەفۆتۆ نوێکردنەوەیەکی بەرچاوە هەبووە بە بەراورد بە نەوەی پێشوو. هەروەها کامێرای سێڵفی بە هەستەوەری ١٨ مێگاپێکسڵ تەیار کراوە لەگەڵ پشتگیریکردنی تایبەتمەندی Center Stage.
پاتری و بارگاویکەرەوەی ئایفۆن ١٧ پرۆ ماکس
ئایفۆن ١٧ پرۆ ماکس بە گەورەترین پاتری لە مێژووی ئایفۆن تەیار کراوە. هەروەها ئەپڵیش بەڵێن دەدات کە باشترین تەمەنی پاتری لە هەر مۆدێلێکی پێشوو پێشکەش بکات.
بەگوێرەی ڕاگەیاندنی فەرمی مۆبایلەکە پشتگیری لە پەخشکردنی ڤیدیۆ تا ٣٩ کاتژمێر دەکات، ئەمەش پێشکەوتنێکی بەرچاوە بە بەراورد بە ٣٣ کاتژمێری ئایفۆن ١٦ پرۆ ماکس. خاڵی گرنگ ئەوەیە مۆدێلەکانی eSIM لە ئەمریکا بە پاترییەکی گەورەترەوەتر بەردەست دەبێت. ئەمەش تەمەنی پاتریەکەیان نزیکەی ٢ کاتژمێر زیاترە لەو وەشانەی کە سیمکارتی فیزیکییان هەیە.
پڕۆسێسەر و بیرگەی ئایفۆن 17 پرۆ ماکس
مۆبایلەکە بە چیپێکی بەهێزی 3 نانۆمەتری A19 Pro تەیار کراوە، کە خێرایی و کارایی بە شێوەیەکی بەرچاو زیاد دەکات. هەروەها ئەم چیپە سیستەمێکی نوێی بەڕێوەبردنی گەرمی بە تەکنەلۆژیای Vapor Chamber بەکاردەهێنێت. ئەم گۆڕانکارییە ئامێرەکە فێنکتر و جێگیر دەکات لە کاتی پرۆسێسکردنی قورسدا. چیپی A19 Pro پرۆسێسەرێکی 6 ناوەکی و GPU ی 6 ناوەکی لەخۆدەگرێت و ئەپڵ بە خێراترین چیپی جیهانی مۆبایلە زیرەکەکان ناوی دەبات.
ئایفۆن ١٧ پرۆ ماکس بە شێوازی دیفۆڵت لەگەڵ ئای ئۆ ئێس ٢٦ دێت کە گۆڕانکارییەکی گەورە لە دیزاینی ڕووکاری بەکارهێنەردا دەهێنێت. تایبەتمەندی Liquid Glass توخمەکانی ڕووکاری بەکارهێنەری ڕوونتر و شووشەییتر و درەوشاوەتر کردووە.
مۆبایلەکە بە چەندین جۆری بیرگە و ڕام بەردەست دەبێت بۆ ئەوەی لەگەڵ پێداویستییە جیاوازەکاندا بگونجێت. ڕێکخستنی ئایفۆن ١٧ پرۆ ماکس لە کەمترین بیرگەی ٢٥٦ گێگابایت لە مۆدێلی بنەڕەتیدا دەست پێدەکات. هەروەها بۆ یەکەمجار کۆمپانیای ئەپڵ وەشانێکیش پێشکەش دەکات کە بیرگەی ٢ تێرابایت هەیە، ئەمەش لە مێژووی ئایفۆندا بێ وێنەیە.
تایبەتمەندیەکانی ئایفۆن 17 پڕۆ
گرنگترین و دیارترین گۆڕانکاری لە ئایفۆن 17 پرۆدا دیزاینی مۆدیۆلی کامێرای دواوەیە. ئەپڵ ئەم بەشە بە فەلاتی کامێرای تەواو پان ناودەبات، کە ئێستا لەبری دوورگەیەکی بچووک تەواوی پانایی پانێڵی پشتەوە دەگرێتەوە. هەروەها ئەپڵ گەڕایەوە بۆ شاسی یونیبۆدی کە لە ئەلەمنیۆمی زنجیرەی 7000 دروستکراوە، کە لە پیشەسازی فڕۆکەوانیدا بەکارهاتووە، دوای ئەوەی لە نەوەی پێشوودا تیتانیۆمی بەکاردەهێنا، کە سووکتر و بەهێزتر و گەرمی زیاتر دەگوازێتەوە.
بۆ یەکەمجار هەردوو پانێڵی پێشەوە و دواوەی مۆبایلەکە بە ڕوپۆشێکی بەهێزی سیرامیک شیڵد ٢ پارێزراون، کە بەرگری لە ڕووشان ٣ هێندە باشتر کردووە. مۆبایلەکە بە سێ ڕەنگی نوێ و جوان دێت کە بریتین لە شینێکی تۆخ و پرتەقاڵی گەردوونی و زیوی.
ڕوونما و کامێرای ئایفۆن 17 پرۆ
ئایفۆن ١٧ پرۆ تایبەتمەندی ڕوونمایەکی ٦.٣ ئینجیی Super Retina XDR لەگەڵ تەکنەلۆژیای ProMotion هەیە. ئەم ڕوونمایە کە لەلایەن سیرامیک شیڵد ٢ پارێزگاری لیدەکرێت، ڕووناکترین ئایفۆنە تا ئێستا، کە لە دەرەوە دەگاتە لوتکەی ڕووناکی ٣٠٠٠ نیت. هەروەها ڕوپۆشێکی نوێی دژە ڕەنگدانەوەی یارمەتی کەمکردنەوەی درەوشانەوەی دەدات. هەروەها ئەزموونی بەکارهێنەر بە تەواوی گۆڕاوە بە iOS 26 و زمانی نوێی دیزاینی Liquid Glass کە دیمەنێکی شەفاف و بریقەدار و شووشەیی بە توخمە جیاوازەکانی ڕووکار دەبەخشێت.
کامێراکە ئەو شوێنەیە کە بەڕاستی ئایفۆن ١٧ پرۆ دەدرەوشێتەوە. بۆ یەکەمجار هەر سێ کامێرای دواوە هەستەوەری فیوژنی 48 مێگاپێکسڵیان هەیە. عەدەسەی نوێی تەلەفۆتۆ، بە دیزاینێکی نەوەی داهاتووی تێتراپریزم و هەستەوەرێکی گەورەتری لەسەدا ٥٦، زوومێکی ٤ هێندە (هاوتای ١٠٠ ملم) و زوومی ٨ هێندە (هاوتای ٢٠٠ ملم) پێشکەش دەکات، زوومێکی دیجیتاڵیش بۆ ٤٠ هێندە زیادکراوە.
لە بەشی ڤیدیۆدا تایبەتمەندی پیشەیی زیاد کراوە، وەک تۆمارکردنی ProRes RAW و پشتگیری Genlock بۆ هاوکاتکردنی وردی چەندین کامێرا. کامێرای سێڵفی، بە یەکەم هەستەوەری چوارگۆشە لە ئایفۆن و ڕوونی ١٨ مێگاپێکسڵ، بە Center Stage تەیار کراوە بۆ چوارچێوەی زیرەک لە وێنە و ڤیدیۆکاندا.
پاتری و بارگاویکەرەوەی ئایفۆن ١٧ پرۆ
کۆمپانیای ئەپڵ پشتڕاستی کردەوە کە ئایفۆن ١٧ پرۆ “باشترین تەمەنی پاتری تا ئێستا لە ئایفۆنێکدا” هەیە. ئەمەش بەهۆی پاترییەکی گەورەتر و چیپی کاراترەوەیە. مۆدێلی eSIM دوو کاتژمێری پەخشکردنی ڤیدیۆی زیاتر پێشکەش دەکات بەهۆی نەهێشتنی سینی سیمکارتەکە. هەردوو مۆدێلەکە دەتوانرێت تەنها لە ماوەی ٢٠ خولەکدا بۆ لەسەدا ٥٠ بارگاوی بکرێتەوە بە ئەداپتەری USB-C بە هێزێکی بەرز (PD2.0).
پڕۆسێسەر و بیرگەی ئایفۆن 17 پرۆ
لە دڵی ئامێرەکەدا چیپی A19 Pro هەیە. ئەم چیپە ٦ ناوەکییە و خێراترین سی پی یو لە هەر مۆبایلێکی زیرەکدا و سیستەمێکی نوێی بەڕێوەبردنی گەرمی لەگەڵدایە.
کۆمپانیای ئەپڵ بۆ یەکەمجار سیستەمێکی ساردکردنەوەی ژووری هەڵمی خستە بازاڕەوە. ئەمەش ڕێگە بە ئامێرەکە دەدات کارایی بەردەوامی لەسەدا ٤٠ باشتر پێشکەش بکات لە چاو نەوەی پێشوو. ئەمەش ڕێگەی پێدەدات لوتکەی کارایی لە کاتی پرۆسێسکردنی قورس وەک یاریکردن یان کارپێکردنی مۆدێلەکانی AI بپارێزێت. جگە لەوەش بۆ یەکەمجار چیپی تۆڕی بێ وایەری N1 ناسێنراوە، لەگەڵ پشتگیریکردنی وای فای ٧ و بلوتوس ٦.
هەرچەندە ئەپڵ بەفەرمی ڕای نەگەیاند، بەڵام پێدەچێت ئایفۆن 17 Pro بە ڕامی 12 گێگابایت تەیار بکرێت بۆ ئەوەی بە ئاسانی مامەڵە لەگەڵ توانا قورسەکانی پرۆسێسکردنی AI و تایبەتمەندی فرەکاری iOS 26 بکات. مۆبایلەکە بە توانای بیرگەی جیاواز بەردەست دەبێت بۆ دابینکردنی پێداویستی بەکارهێنەرانی جیاواز.
تایبەتمەندیەکانی iphone 17
دیزاینی گشتی ئایفۆن ١٧ بە بەراورد بە نەوەی پێشوو گۆڕانکارییەکی ئەوتۆی بەسەردا نەهاتووە و ئەپڵ تەنیا گرنگی بە باشترکردنی کوالێتی شاشەکەی داوە. مۆبایلەکە دیزاینێکی نەرم و لێواری کێشراوی هەیە کە گرتنی ئاسانتر دەکات. ئایفۆن ١٧ بە پێنج ڕەنگی وەنەوشەیی، شین، ڕەش، سپی، سەوز بەردەست دەبێت.
ڕوونما و کامێرای ئایفۆن 17
ئایفۆن 17 ڕوونمایەکی ٦.٣ ئینجیی هەیە و هەروەها پشتگیری لە تەکنەلۆژیای ProMotion دەکات بە ڕێژەیەکی بەرزی نوێکردنەوە بۆ یەکەمجار. بەپێی ئامارەکانی ئەپڵ، ڕێژەی نوێبوونەوەی شاشەی ئایفۆن ١٧ بۆ ١٢٠ هێرتز بەرزکراوەتەوە. هەروەها مۆبایلەکە پشتگیری لە تایبەتمەندی Always-On display دەکات کە ڕوونمای قوفڵەکە لە ڕووناکییەکی کەمدا پیشان دەدات.
هەروەها زۆرترین ڕووناکی ڕوونمای ئایفۆن ١٧ بۆ ٣٠٠٠ نیت بەرزکراوەتەوە، ئەمەش پێشکەوتنێکی بەرچاوە. هەروەها کۆمپانیای ئەپڵ ڕوپۆشێکی نوێی دژە ڕەنگدانەوەی لەسەر مۆبایلەکە بەکارهێناوە، ئەمەش خوێندنەوەی ڕوونماکە لە بارودۆخی ڕووناکی زۆردا باشتر دەکات، چ لە ژوورەوە و چ لە بەر خۆردا.
کۆمپانیای ئەپڵ دیزاینێکی نوێی بۆ کامێرای سێڵفی ئایفۆن 17 کردووە بە هەستەوەرێکی نوێی ١٢ مێگاپێکسڵ کە نزیکەی دوو هێندەی نەوەی پێشوو گەورەترە. کۆمپانیاکە دەڵێت، هەستەوەرەکە بە باشترین شێوە بۆ گرتنی سێڵفی بە هەر ئاراستەیەک بێت.
ئێستا بەکارهێنەران دەتوانن بە ئایفۆن ١٧ وێنەی سێڵفی لاندسکپ بگرن بەبێ ئەوەی بە شێوەیەکی فیزیکی مۆبایلەکە بسووڕێنن. ئەم گۆڕانکارییە لە ڕێژەی ڕووبەرەکان بە شێوەیەکی ئۆتۆماتیکی ڕوودەدات کاتێک مۆبایلەکە کەسانی دیکە لە چوارچێوەکەدا دەستنیشان دەکات. ئەپڵ ئەم تایبەتمەندییە بە Center Stage ناودەبات. هێشتا دوو عەدەسەی کامێرا لە پشتەوەی مۆبایلەکەدا هەیە، بەڵام عەدەسەی گۆشە فراوانی مۆبایلەکە بە هەستەوەرێکی نوێی 48 مێگاپێکسڵ بە ڕوونییەکی بەرزتر نوێکراوەتەوە.
پاتری و بارگاویکەرەوەی ئایفۆن ١٧
ئەپڵ بانگەشەی ئەوە دەکات کە ئایفۆن ١٧ دەتوانێت تا یەک ڕۆژ تەمەنی پاتری بە بەکارهێنەران بدات بە یەک جار بارگاویکردنەوە و ٨ کاتژمێر زیاتر لە ئایفۆن ١٦ پەخشکردنی ڤیدیۆ پێشکەش دەکات. هەروەها دەتوانیت ٨ کاتژمێر پەخشکردنی ڤیدیۆ بەدەستبهێنیت تەنها بە ١٠ خولەک بارگاویکردنەوە.
پڕۆسێسەر و بیرگەی ئایفۆن 17
ئایفۆن 17 بە چیپی نوێی ئەپڵ A19 کاردەکات کە بەڵێنی خێراترکردنی سی پی یو و جی پی یو دەدات. چیپەکە دیزاینێکی سی پی یوی شەش ناوەکی هەیە، هەروەها کارایی GPU بە بەراورد بە نەوەی پێشوو باشتر کراوە. ئەپڵ دەڵێت کارایی GPU لە چیپی A19 تا لەسەدا 20 خێراترە لە چیپی A18 لە ئایفۆن 16ی ساڵی ڕابردوودا.
ئایفۆن ١٧ بە ڕامی ٨ گێگابایت، کە هەمان ڕامی نەوەی پێشووترە بەردەست دەبێت. هەروەها مۆبایلەکە بە توانای بیرگەی بنەڕەتی ٢٥٦ گێگابایت بەردەست دەبێت. هەروەها وەشانی 512 گێگابایتیشی هەیە.
تایبەتمەندیەکانی iphone air
ئایفۆن ئەیر ڕوونمایەکی ٦.٥ ئینجیی Pro و چیپی A19 Pro و iOS 26ی لەگەڵدایە، کە تێکەڵەیەک لە ڕەنگینیی و هێز پیشان دەدات. مۆبایلەکە کە جێگەی مۆدێلی پڵەس لە خێزانی ئایفۆن دەگرێتەوە، بەبێ سینی سیمکارتی فیزیکی دێت و تەنها سیمیمی ئەلیکترۆنی بەکاردەهێنێت. هەروەها ئایفۆن ئایر بە ڕووکاری iOS 26 بەردەستە و هەروەها پشتگیری لە تایبەتمەندییەکانی Apple Intelligence دەکات.
بە ئەستووری 5.6 ملم، ئایفۆن ئەیر تەنکترین مۆبایلی ئەپڵە تا ئێستا، هەروەها ڕکابەرییەکی نوێ لە بازاڕی مۆبایلە زیرەکەکاندا دروست دەکات. بۆ بەراوردکردن، ئایفۆن ١٦ پرۆ ئەستووری ٨.٢٥ ملم بووە. پێش ئەوەی ئایفۆن ئەیر نمایش بکرێت، ئایفۆن ٦ تەنکترین مۆبایلی ئەپڵ بوو بە قەبارەی ٦.٩ ملم.
ئەپڵ دەڵێت دیزاینی ئایفۆن ئەیر زۆر بەهێزە و چوارچێوەی تیتانیۆمی ڕیسایکل کراو بەکاردەهێنێت. بۆیە نابێت خەمی چەمانەوەی ئامێرەکە بخۆین. بێگومان ناتوانین بە دڵنیاییەوە ئەمشتە بڵێین تا ئەم مۆبایلە تەنکە لە بازاڕدا بەردەست نەبێت و تاقی نەکرێتەوە. کۆمپانیای ئەپڵ دەڵێت، بۆ یەکەمجار سیرامیک شیڵد ٢ی لەسەر پشتی ئایفۆن ئەیر بەکارهێناوە بۆ زیادکردنی تەمەنی ئایفۆنەکە.
هەروەها چوارچێوەی ئایفۆن ئەیر دوگمەی Action و دوگمەی Camera Control لەخۆدەگرێت، بەمەش دەتوانیت بە ئاسانی کامێراکە بکەیتەوە یان دەستت بگات بە تایبەتمەندییەکانی Visual Intelligence.
ڕوونما و کامێرای ئایفۆن ئەیر
ئایفۆن ئایر ڕوونمایەکی پەرەپێدانی OLED بە قەبارەی ٦.٥ ئینج بەکاردەهێنێت کە ڕێژەی نوێبوونەوەی دەتوانێت بگاتە ١٢٠ هێرتز. دەوترێت ڕوونماکە زۆرترین ڕووناکی ٣٠٠٠ نیتی هەیە. بە سیرامیک شیڵد ٢ داپۆشراوە کە تا ٣ هێندەی پێشوو بەرگری لە ڕووشان دەکات.
ئایفۆن ئەیر تەنها خاوەنی یەک سیستەمی کامێرای فیوژنە بە قەبارەی 48 مێگاپێکسڵ، بەڵام ئەپڵ بانگەشەی ئەوە دەکات کە کارایی چوار عەدەسەی ھاوشێوە دەکات. کامێراکە دۆخی زووم 1x و 2xی هەیە. ئەپڵ دەڵێت کامێرای ئایفۆن ئەیر لە دۆخی ئاساییدا 26 ملم فۆکەسی هەیە، لە دۆخی 2x زوومدا 52 ملم فۆکەسی هەیە، ئەمەش ڕوونییەکەی بۆ 12 مێگاپێکسڵ زیاد دەکات.
لە ڕووی پێشەوە ئایفۆن ئەیر کامێرای ١٨ مێگاپێکسڵی هەیە لەگەڵ سەنتەر ستێج کە زیرەکی دەستکرد بەکاردەهێنێت بۆ ئەوەی بە شێوەیەکی ئۆتۆماتیکی مەیدانی بینین فراوانتر بکات و چوارچێوەی وێنەکە بخولێنێتەوە.
یەکێک لە تایبەتمەندییەکانی ئایفۆن ئەیر توانای تۆمارکردنی ڤیدیۆیە بە هەردوو کامێرای دواوە و پێشەوە لە یەک کاتدا. لەم حاڵەتەدا تایبەتمەندی جێگیرکردنی وێنە ڕێگەت پێدەدات وێنەکەت لە چوارچێوەی کامێرای پێشەوەدا بهێڵیتەوە لەکاتی تۆمارکردندا، لەکاتێکدا کامێرای دواوە دەتوانێت زووم بکات.
پاتری و بارگاویکەرەوەی ئایفۆن ئەیر
ئەپڵ بەڵێن دەدات کە ئایفۆن ئەیر بە یەک جار بارگاویکردنەوە دەتوانێت یەک ڕۆژ بەرگە بگرێت. ئەم مۆبایلە ئاست بەرزەی ئەپڵ بە ڕێژەی لەسەدا ٣٠ کەمتر هێز بەکاردەهێنێت و کاراترین ئایفۆنە کە تا ئێستا لە بواری وزەدا. کۆمپانیای زەبەلاحی کوپەرتینۆ دەڵێت ئایفۆن ئایر دەتوانێت تا ٢٧ کاتژمێر ڤیدیۆ پەخش بکات.
پڕۆسێسەر و بیرگەی ئایفۆن ئەیر
دڵی ئایفۆن ئایر چیپی بەهێزی A19 Pro یە کە بە بەهێزترین چیپی مێژووی ئایفۆن دادەنرێت. خاوەنی سی پی یویەکی شەش ناوەکییە و جی پی یویەکی هەیە کە پشتگیری لە نەوەی دووەمی Dynamic Caching و پاڵپێوەنانی وێنەی یەکگرتوو دەکات. GPUی ئایفۆن ئەیر ٥ ناوەکی هەیە و تا ٣ هێندەی نەوەی پێشوو هێزی زیاتری هەیە.
هەروەها مۆبایلی ئایفۆن ئایر تایبەتمەندی مۆدێمی نوێی خانەیی ئەپڵی هەیە کە بریتییە لە C1X کە دوو هێندە خێراترە لە C1. چیپێکی دیکەی تایبەت بە خۆی کە بریتییە لە N1، کە وای فای ٧ و بلوتوز و پەیوەندی Thread بەیەکەوە بەردەست دەخات.
مۆدێلی بنەڕەتی 256 گێگابایت بیرگەی ناوەکی لەگەڵدایە. هەروەها ئایفۆن ئایر بە وەشانی بیرگەی 512 گێگابایت و 1 تێرابایت لە بازاڕەکان بەردەست دەبێت.
